U Bushinwa: Abagera kuri 60,000 bishwe na Covid-19 mu kwezi kumwe
Komisiyo ishinzwe ubuzima mu Bushinwa, yatangaje ko hagati ya tariki 8 Ukuboza 2022 na 12 Mutarama 2023 abantu 59,938 bapfuye ku mpamvu zifitanye isano n’indwara ya Covid-19.
Jiao Yahui, umwe mu bayobozi ba Komisiyo ishinzwe ubuzima yabwiye itangazamakuru kuri uyu wa Gatandatu ko abantu 5,503 bapfuye kubera Covid-19 mu gihe abandi 54,435 bari bafite Covid-19 ariko basanzwe barwaye izindi ndwara zirimo kanseri n’iz’umutima.
Ubusanzwe u Bushinwa bwatangazaga imibare y’abapfuye bishwe na Covid-19 gusa, aho kuba izindi ndwara zishobora kongererwa ubukana na Covid-19.
Umuryango Mpuzamahanga wita ku Buzima (OMS) watangaje ko ugiye gusesengura imibare yatanzwe n’u Bushinwa kugira ngo harebwe icyakorwa.
Jiao yavuze ko muri iyi minsi ishize, abantu barwaye Covid-19 mu Bushinwa biyongereye, baba abo bayisangamo ndetse n’abajya kurwarira mu bitaro.
Hashize iminsi u Bushinwa bufunguye amarembo ku bashaka kwinjira cyangwa kuva muri icyo gihugu bajya mu ngendo zitandukanye, nyuma y’imyaka hafi itatu hariho ingamba zikakaye zigamije guhashya icyorezo cya Covid-19.
